قصيده للشاعر رحيم المالكي بها يعاتب نهر الفرات اتركم مع كلمات القصيدة
( الفرات )
شلـون تجري ومايك ازرك يافــرات - وانتة ذنبك مو ذنب يفـطر سمة
اتسابكت بالطف على حسين السيوف .. ومايك اول سهم في صدرة انرمة
وطاح ابو السجاد يم جرفك شهيد .. ابين سيفين العدة وسيف الظــمة
وجان مايك احد من كل السيــوف .. اثر على حســين حيل وألمـة
السيــوف اعتنت تطلب دم حســين .. وهاي حاسبهة الحسين ابمقدمة
بس بنات المصـطفى حرت جبود . . حسيــن حر وهاي للحر تلجمـة
وعطش عبد الله التفرفح بين ايديه . . وكطـع كماطة ولعد مايك ومــة
هاي بس وحدهة صارت كربلاء .. عالحســين وكربلة من الشــرذمة
انة لو منك اودي ويه الطيــور .. ماي خاطــر منسـئل ليش ولـمه
لكن انتة تريد تذنب يافرات . . وهــاي ماتحتاــج شرح وترجــمة
افرط عقد الدين وجروفك تشوف . . وجان ممكن غرفة منــك تلـظمة
عطشيـت الدين عن بكرة ابيه . . وكــطعيت جــفوف راعي الموزمة
تدري لو مايك وصــل يم الخيام .. جا روة العبــاس منهم صــارمة
وجان ما ردت رؤوس على الركـاب .. وجان ردت خيلهم تكطر دمــة
شلون يمك طاح عطشان الحســين . . وما ركض مايك ويم جـدمة ارتمة
طاعت اسماعيل صحــراء الحجاز.. وانتة شح مايك لبن حامي الحــمة
ماظن اسماعــيل اكرم من حســين . . ولا اظن امـة تتقدم فاطــمة
ذاك ابن نبي سأل ربــة الجــليل . . كيف تحي الموتى وتـرد قائــمة
وهذا ابن حـيدر علي سيف الرســول .. المايهاب ابدينة لومة لائمــة
الكــال لو ينكشف عن عيني الغطــاء .. مايزيد من اليقين الفاهــمة
يا فرات وتجري بعدك يافــرات .. المايشوف الحــق عسة بعينة العـمة
كلهة ماتت خجل يا نهر الفــرات . . وانتة اخر شـاهد على الملحــمة
كوم طم روحك حدر كبـر الحســين .. واعتذر لله واطـلب مرحمــة
كوم واغســل مايــك برمل الحســين .. وخلي مايك يانهـر يتيممة
وشوف فرق البينك وبين الكرام . . حســين شاف الدين عطـشان الدمة
ضحى باخر قطرة من دمة الشـريف . . وظلت اخر قطــرة ثورة وقائمة
حســين صافي واصفة من ماي الجـنان .. وانتة مايك طين وجروفك طمة
حســين نبع الجود وانتة اسمــك نهر .. ويانهر للمنبع انـطة وكــرمة
حســين لو منك شرب جان ارتويت . . وجـا تشرف مايك يلامس فمة
لاكن انتة الحظ عمـاك وتيـهت . . وسوء حظــك رادلك هالخاتمــة
0 التعليقات:
إرسال تعليق